ᓄᓇᓕᖃᕐᕕᖓᑦ

ᕿᑭᕐᑕᓄᑦ ᐊᖏᖃᑎᒌᒍᑎᐅᓯᒪᔪᐃᑦ ᓄᓇᖁᑎᖓᑦ

ᓄᓇᕕᐅᑉ ᑕᕆᐅᖁᑎᖓᑦ

ᓄᓇᕕᐅᑉ ᓄᓇᖁᑎᖓᑦ

ᕿᑭᕐᑕᓄᑦ ᐊᖏᖃᑎᒌᒍᑎᐅᓯᒪᔪᐃᑦ ᓄᓇᖁᑎᖓᑦ

ᓄᓇᕕᒻᒥ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᑦ ᐊᑐᓯᓚᐅᔪᕗᑦ ᔪᓓ 10, 2007-ᒥ. ᑖᒃᑯᐊ ᐊᑐᕐᓂᖃᕐᑐᑦ ᐃᒪᕐᐱᒧᑦ ᐊᕙᓗᐊᕆᓯᒪᔪᓄᑦ ᑯᐯᒃᒥ, ᓛᐸᑐᐊᑉ ᑕᕐᕋᖓᓂ ᐊᒻᒪᓗ ᓛᐸᑐᐊᑉ ᐃᒪᕐᐱᖓᑕ ᑕᕐᕋᖓᓂᒃ. ᓄᓇᕕᐅᑉ ᐃᓄᖏᑦᑕ ᐱᔪᓐᓇᐅᑎᖏᑦ ᐃᒪᕐᐱᒧᑦ ᐃᓕᑕᕆᔭᐅᓚᐅᔪᒻᒪᑕ ᐱᔭᕇᕐᑕᐅᓯᒪᖕᖏᒋᐊᖏᑦ 1975-ᒥ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖃᕐᑎᓗᒍ. ᑭᓯᐊᓂᓕ ᐊᒥᓱᒻᒪᕆᓐᓂᒃ ᐊᕐᕌᒍᕐᓂᒃ ᖃᐅᔨᒐᓱᐊᑦᓯᐊᓚᐅᑲᑦᓱᑎᒃ ᑲᕙᒪᓕᕆᖃᑦᑕᓱᑎᓪᓗ ᐃᓕᑕᕆᔭᐅᔪᕐᑎᒍᑦ ᐅᖃᒻᒪᕆᐅᑎᓂᒃ ᓄᓇᖃᕐᓂᕋᐅᑎᓄᑦ ᑲᔪᓯᒍᓐᓇᓂᕋᕐᑕᐅᓕᕐᓱᑎᒃ ᐊᖏᕐᑕᐅᓴᕋᑕᓚᐅᔪᒻᒪᑕ ᔭᓄᐊᕆ 1992-ᒥ ᐊᖏᖃᑎᒌᒐᓱᐊᕈᑎᒋᔭᐅᓂᐊᓕᕐᑎᓗᒋᑦ ᑲᕙᒪᑐᖃᒃᑯᓗ. ᑖᒃᑯᓇᓂᑦᓭᓇᖅ ᐅᓪᓗᓂ, ᐃᒻᒥᒎᕐᑐᓂᒃ ᐱᖃᕐᓂᕋᐅᑎᓂᒃ ᓚᐹᑐᐊᒨᓕᖓᔪᓂᒃ ᐊᑐᐃᓐᓇᕈᕐᑎᑕᐅᔪᖃᓚᐅᔪᒻᒥᔪᖅ. ᐊᖏᖃᑎᒌᒐᓱᐊᕈᑎᑦᓴᐅᓂᖏᑦ ᑲᔪᓯᒍᓐᓇᓂᕋᕐᑕᐅᓕᓚᐅᕐᓯᒪᔪᑦ ᔫᓂ 1993-ᒥ.

ᐊᖏᖃᑎᒌᓐᓂᒦᑦᑐᐃᑦ ᓱᓇᐅᓂᖏᓐᓄᑦ

ᐊᖏᖃᑎᒌᓐᓂᒦᑦᑐᐃᑦ ᓱᓇᐅᓂᖏᓐᓄᑦ/ᓱᓗᐊᖑᐊᓯᒪᔪᐃᓪᓗ

ᐊᖏᖃᑎᒌᓐᓂᐅᑉ ᓄᓇᖁᑎᖏᑦᑕ ᓱᓇᐅᓗᐊᖑᐊᓂᖏᑦ

- ᓄᓇᕕᐅᑉ ᐃᓄᐃᑦ ᒫᓐᓇᑯᑦ ᓇᒻᒥᓂᖃᓕᕐᑐᑦ ᕿᑭᕐᑕᓕᒫᑦ 80% ᐳᓴᓐᑎᖏᓐᓂᒃ, ᑕᒣᑎᒍᑦ ᖄᖓᒍᓪᓗ ᐊᑖᑎᒍᓪᓗ, ᓄᓇᕕᐅᑉ ᑕᕆᐅᖁᑎᖓᓂ, ᐊᖏᓂᓕᓐᓂᒃ 5,300-ᓂᒃ ᓯᒃᑭᑕᓂᒃ ᑭᓚᒦᑕᓂᒃ.
- ᒪᑭᕝᕕᑯᑦ ᐱᑎᑕᐅᖃᑦᑕᕙᓪᓕᐊᓕᕐᑐᑦ $86 ᒥᓕᐊᓪᑖᓚᓂᒃ ᑮᓇᐅᔭᒻᒪᕆᐅᑎᓪᓗᒋᑦ ᐃᓚᖏᓪᓗ ᐊᓪᓚᖁᑎᒋᔭᐅᑎᓪᓗᒋᑦ, $55 ᒥᓕᐊᓐᑖᓚᓂᒃ ᑮᓇᐅᔭᖃᕐᑎᑕᐅᔪᖃᕐᓂᐊᒥᑎᓗᒍ ᐅᑯᓂᖓ ᓄᓇᕕᒻᒥ ᐃᓄᐃᑦ ᑮᓇᐅᔭᖁᑎᖏᓐᓂᒃ ᐊᒡᒍᑐᕐᑕᐅᓛᕐᓂᐊᑐᓂᒃ ᐃᓄᑑᓈᕐᑎᑐᓄᑦ ᓄᓇᕕᐅᑉ ᐃᓄᖏᓐᓄᑦ.
- ᐊᐅᓚᑦᓯᔨᐅᖃᑎᒌᑦ ᑎᒥᐅᔪᐃᑦ ᑐᑭᑖᕆᔨᓪᓚᕆᐅᒍᓐᓇᑐᓂᒃ ᓄᐃᑕᐅᔪᖃᕐᓱᓂ ᑲᒪᒋᔭᖃᕐᓂᐊᑐᓂᒃ ᐆᒪᔪᓕᕆᓂᕐᒥᒃ, ᓄᓇᐅᑉ ᑲᒪᒋᔭᐅᓂᖓᓂᒃ, ᐊᒻᒪᓗ ᐱᕙᓪᓕᐊᑎᑕᐅᔪᐃᑦ ᓱᕐᕃᒍᑎᖏᓐᓅᓕᖓᔪᓂᒃ.
- ᐱᔪᓐᓇᐅᑏᑦ ᓱᕐᖁᐃᑕᐅᒪᓂᖃᕐᑎᑕᐅᔪᑦ ᐊᑐᕐᑕᐅᔪᖃᕐᓱᓂ ᐃᒣᑦᑐᒥᒃ “ᐊᐅᓚᑦᓯᒪᕆᓐᓂᑎᒍᖕᖏᑐᒥᒃ ᐱᔪᓐᓇᐅᑎᖃᕐᓂᒥᒃ” ᐊᑐᕐᑕᐅᔪᖃᖕᖏᖔᕐᓗᓂ ᐃᒣᑦᑐᒥᒃ “ᓴᒃᑯᓯᓂᕐᒥᒃ ᖃᒥᑎᕆᓂᕐᒥᓗ” ᔦᒥᔅᐯᑉ ᐊᖏᖃᑎᒌᓐᓂᖓᑎᒍᑦ.

ᓄᓇᑖᕐᓂᒨᓕᖓᔪᑦ ᑲᒪᒋᔭᖃᓲᖑᒻᒪᑕ ᐱᔭᕇᕐᑕᐅᒪᖕᖏᑐᒥᒃ ᐱᓇᓱᐊᕐᑕᐅᒪᔪᒥᒃ ᐊᖏᒻᒪᕆᐅᑎᓕᐅᕐᓂᒧᑦ ᑲᓇᑕᒥ. ᑕᒪᒃᑯᐊ ᐱᖃᕐᓂᕋᐅᑏᑦ ᓄᐃᖃᑦᑕᓯᒪᔪᑦ ᑲᓇᑕᐅᑉ ᓄᓇᖁᑎᖓᓂ ᓄᓇᖃᕐᖄᓯᒪᔪᐃᑦ ᓄᓇᒧᑦ ᐱᔪᓐᓇᐅᑎᖏᑦ ᑲᒪᒋᔭᐅᓯᒪᖕᖏᑐᐊᕐᒪᑕ ᐊᖏᒻᒪᕆᐅᑎᐅᓯᒪᔪᕐᓄᑦ ᓯᕗᓂᐊᒍᑦ ᐅᕝᕙᓘᓐᓃᑦ ᐊᓯᐊᒍᑦ ᐱᖁᔭᑎᒍᕐᑐᓄᑦ. ᑕᒪᒃᑯᐊ ᐱᓪᓗᒋᑦ, ᓯᕗᓂᕐᒧᑦ ᑕᑯᓐᓈᓂᖃᕐᑐᓂᒃ ᐅᓪᓗᒥᓂᑕᕐᓂᒃ ᐊᖏᒻᒪᕆᐅᑎᑦᓴᓂᒃ ᐊᖏᖃᑎᒌᒐᓱᐊᕈᑕᐅᔪᖃᓲᖑᓕᕐᑐᖅ ᑕᒪᒃᑯᓄᖓ ᓄᓇᖃᕐᖄᓯᒪᔪᓄᑦ, ᑲᓇᑕᒧᓪᓗ, ᐊᒻᒪᓗ ᐊᕕᑦᑐᓯᒪᔪᕐᓄᑦ. ᑖᒃᑯᐊ ᓄᓇᕕᐅᑉ ᐃᓄᖏᑦᑕ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᑦ ᐃᓱᒪᒋᔭᐅᓂᖃᕐᑐᑦ ᓄᓇᑖᕋᓱᐊᒻᒪᕆᐅᑎᐅᒋᐊᖏᑦ ᐊᒻᒪᓗ ᐃᓗᓕᖃᕐᓱᓂ ᐊᒥᓲᓈᕐᑎᑐᓂᒃ ᐊᓪᓚᑕᐅᒪᔪᓂᒃ ᓇᓗᓀᕐᓯᒍᑎᐅᑎᓪᓗᒋᑦ ᐊᖏᖃᑎᒌᒐᓱᐊᕈᑕᐅᓯᒪᔪᓂᒃ ᓄᓇᑖᕋᓱᐊᕐᓂᑯᑦ ᑕᒪᒃᑯᓄᖓ ᑭᒡᒐᑐᕐᑎᒋᔭᐅᔪᓄᑦ.

ᖃᕆᑕᐅᔭᒃᑯᑦ ᓂᐱᓕᐅᕐᑕᐅᒍᓐᓇᑐᑦ ᐊᖏᖃᑎᒌᒍᑏᑦ ᐅᓪᓗᖃᕐᑎᓯᒍᑎᖏᑦ

ᓄᓇᕕᐅᑉ ᑕᕆᐅᖁᑎᖓᑦ

ᓄᓇᕕᐅᑉ ᑕᕆᐅᖁᑎᖓ ᐃᓚᖃᕐᑐᑦ ᐃᓗᓐᓇᖏᓐᓂᒃ ᑕᕆᐅᒥᑦᑐᓕᒫᓂᒃ, ᕿᑭᕐᑕᓂᒃ, ᓄᓇᓂᒃ ᐃᒪᕐᓂᓗ ᓄᓇᕐᔪᐊᒦᑦᑐᓂᒃ ᐃᓕᑕᕆᔭᐅᒪᓂᖃᕐᑐᒥ ᐊᓪᓚᖁᑎᖏᑦ 3-2-ᒥ ᓄᓇᕕᐅᑉ ᐃᓄᖏᑦᑕ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᓐᓂ. ᓄᓇᐅᑉ ᑕᕆᐅᖁᑎᖓ ᐃᓚᖃᕐᑐᖅ ᐃᒪᕐᓂᒃ ᐊᑦᔨᒋᑦᑐᒥᒃ ᐊᑐᕐᑕᐅᓲᒥᒃ ᐃᓚᒋᑦᓱᒋᑦ ᓄᓇᕗᑦ ᐃᓄᖏᑦ, ᐊᒻᒪᓗ ᐃᒪᕐᓂᒃ ᐊᑦᔨᒋᑦᑐᒥᒃ ᐊᑐᕐᑕᐅᓲᒥᒃ ᓇᔪᕐᑕᐅᓲᒥᓪᓗ ᐊᒻᒪᓗ ᓇᒻᒥᓂᖃᑎᒌᒍᑕᐅᓲᓂᒃ ᐃᓚᒋᑦᓱᒋᑦ ᔦᒥᔅᐯᑉ ᐃᓚᖏᑦ. ᓄᓇᕕᐅᑉ ᑕᕆᐅᖁᑎᖓ ᐊᕕᑦᑐᑕᐅᒪᒋᐊᓪᓚᓂᐊᕐᑐᖅ 3-ᖑᑎᑕᐅᓗᓂ, ᐃᒪᖓ ᐊ, ᐃᒪᖓ ᐸ, ᐊᒻᒪᓗ ᐃᒪᖓ ᑕ. ᓄᓇᕕᒃ ᓄᓇᐅᕗᖅ ᐊᖏᓂᖃᕐᓱᓂ 660,000-ᓂᒃ ᓯᒃᑭᑕᓂᒃ ᑭᓚᒦᑕᓂᒃ 55 ᐃᑳᖓᔫᑉ ᖁᓛᓂ ᑯᐯᒃ ᓄᓇᖓᓂ. ᓄᓇᕕᐅᑉ ᓄᓇᖓ ᐊᖏᓂᖃᕐᑐᖅ ᐱᖓᔪᒋᔭᐅᓪᓗᐊᑐᒥᒃ ᑯᐯᓕᒫᒥ.

ᐱᖓᓱᐃᑦ ᐃᒪᖁᑎᒋᔭᐅᔪᐃᑦ ᒥᑦᓵᓄᒋᐊᓪᓚᒃ

ᐃᒪᖁᑎᖓ ᐊ

ᓄᓇᕕᐅᑉ ᑕᕆᐅᖁᑎᖓᓂ ᐃᒪᖁᑎᖓ ᐊ ᐊᑦᔨᒋᑦᑐᒥᒃ ᐊᑐᕐᑕᐅᒍᓐᓇᑐᒥᒃ ᓇᔪᕐᑕᐅᒍᓐᓇᑐᒥᓪᓗ ᑕᒣᓐᓄᑦ ᓄᓇᕗᑦ ᐃᓄᖏᓐᓄᓗ ᔦᒥᔅᐯᑉ ᐊᓪᓚᖏᓐᓄᓗ, ᐊᒻᒪᓗ ᓄᓇᐅᑉ ᐃᓚᖓᓂᒃ ᑎᒍᒥᐊᕐᑕᐅᖏᓐᓇᓚᐅᕐᑐᒥᑦ ᑲᕙᒪᒻᒪᕆᒃᑯᓄᑦ ᐲᕐᑕᐅᒪᓕᕐᑐᑦ. ᑌᒣᒻᒪᑦ, ᓄᓇᕕᐅᑉ ᑕᕆᐅᖁᑎᖓᓂ ᐃᒪᖁᑎᖓ ᐊ ᐃᒪᐅᓕᕐᑐᖅ ᓄᓇᖁᑎᓕᒫᖏᑦ ᐱᒋᔭᐅᓯᑎᓪᓗᒋᑦ ᓄᓇᕕᐅᑉ ᐃᓄᖏᓐᓄᑦ. ᓄᓇᐅᑉ ᑭᓪᓕᖏᑦᑎᒍᑦ ᐱᔪᓐᓇᓯᑎᑦᓯᒍᓐᓇᓂᕐᒧᑦ ᑭᓪᓕᕆᔭᐅᑎᑕᐅᔪᓄᑦ, ᑕᑯᒋᐊᕐᑕᐅᔪᖃᕈᓐᓇᑐᖅ ᐊᓪᓚᖁᑎᖏᑦ 8-1-ᒥ ᐊᖏᖃᑎᒌᒍᑎᓂ.

ᐃᒪᖁᑎᖓ ᐊ ᑭᓯᐊᓂ ᐱᖓᓱᓂᒃ (3) ᐃᓚᐅᑎᑕᐅᔪᖃᖕᖏᑐᖅ ᐃᓗᓐᓈᒍᑦ ᑭᓪᓕᑕᓕᒫᖓᓂ ᓄᓇᓂᒃ ᑎᒍᒥᐊᕐᑕᐅᖏᓐᓇᑐᓂᒃ ᑲᕙᒪᒻᒪᕆᒃᑯᓄᑦ. ᓄᓇᕕᐅᑉ ᑕᕆᐅᖁᑎᖓᓂ ᐃᒪᖁᑎᖓ ᐊ, ᑐᑦᔮᑦ ᕿᑭᕐᑕᖓ ᐃᓚᐅᑎᑕᐅᖏᑐᖅ (ᑕᑯᓗᒋᑦ ᐊᓪᓚᖁᖏᑦ 8-1ᐸ ᐊᖏᖃᑎᒌᒍᑎᓂ) ᒥᑭᔪᑦᓱᓂ ᓄᓇᐅᔪᖅ ᑐᑦᔮᑉ ᓯᕿᓂᖓᓂ ᐃᑭᕋᓴᕐᔪᐊᒥ (ᐃᕗᔨᕕᐅᑉ ᑕᕐᕋᖓᓂ), ᐊᑉᐸᑑᖅ ᕿᑭᕐᑕᖓᓗ ᐅᖓᕙᒥ ᐱᖓᓱᐃᓕᖓᔪᒥᒃ ᓄᓇᖃᕐᑎᑕᐅᒻᒥᔪᖅ ᐃᓚᐅᑎᑕᐅᖏᑐᓂᒃ ᑎᒍᒥᐊᕐᑕᐅᖏᓐᓇᓱᑎᒃ ᑲᕙᒪᒻᒪᕆᒃᑯᓄᑦ. ᐊᓪᓚᖁᑎᖏᑦ 8.1ᑕ ᐊᖏᖃᑎᒌᒍᑎᓂ ᓄᐃᑕᑎᑦᓯᔪᑦ ᐊᕕᑦᑕᐅᒪᔪᖅ 1 ᐃᓚᐅᑎᑕᐅᖏᑐᒥᒃ, ᐊᓪᓚᖁᑎᖏᑦ 8-1ᑲ ᓄᐃᑕᑎᑦᓯᔪᑦ ᐊᕕᑦᑕᐅᒪᔪᖅ 2-ᒥᒃ ᐃᓚᐅᑎᑕᐅᖏᑐᒥᒃ. ᐊᕕᑦᑕᐅᒪᔪᖅ 3 ᐊᑉᐸᑑᑉ ᑕᕐᕋᖓᓃᑦᑐᒥᒃ ᓄᓇᒥᒃ ᑎᒍᒥᐊᕐᑕᐅᖏᓐᓇᑐᒥᒃ ᑲᕙᒪᒻᒪᕆᒃᑯᓄᑦ ᐊᕙᑎᓕᕆᓂᒃᑯᑦ ᐃᓱᒫᓗᑎᖃᕐᓱᑎᒃ.

ᐃᒪᖁᑎᖓ ᐸ

ᐃᒪᖁᑎᖓ ᐸ ᓄᓇᕕᐅᑉ ᑕᕆᐅᖁᑎᖓᓂ ᓄᐃᑕᑎᑦᓯᔪᖅ ᐊᑦᔨᒋᑦᑐᒥᒃ ᐊᑐᕐᑕᐅᓲᒥᒃ ᓇᔪᕐᑕᐅᓲᒥᓪᓗ ᓇᒻᒥᓂᕆᔭᐅᑦᓱᓂ ᐃᓚᒋᑦᓱᒋᑦ ᔦᒥᔅᐯᑉ ᐊᓪᓚᖏᑦ. ᐃᓗᓐᓇᑎᒃ ᓄᓀᑦ ᐃᒪᖁᑎᖓ ᐸ-ᖓᑕ ᐃᓗᐊᓃᑦᑐᑦ ᓇᒻᒥᓂᕆᔭᐅᔪᑦ ᑕᒣᓐᓄᑦ ᐃᓄᓐᓄᓗ ᐊᓪᓚᓄᓪᓗ ᑭᓯᐊᓂ ᐅᑯᓂᖓᐅᖏᑐᖅ:

Gillies Island ᕿᑭᕐᖓᑕ ᒪᓕᑦᓱᒋᑦ ᐃᓕᑕᕆᔭᐅᒪᒍᑎᑦ ᑌᔭᐅᒍᑎᖏᓐᓂ 164-ᒥ ᓄᓇᕗᑦ ᓄᓇᓕᕆᕕᖓᑕ ᐊᓪᓚᕕᖓᓂ.

ᐃᒪᖁᑎᖓ ᑕ

ᓄᓇᕕᐅᑉ ᑕᕆᐅᖁᑎᖓᓂ ᐃᒪᖓ ᐊᕕᑦᓯᒪᑎᑕᐅᔪᖅ ᐊᑦᔨᒋᑦᑐᒥᒃ ᐊᑐᕐᑕᐅᓂᕐᒥᒍᑦ ᓇᔪᕐᑕᐅᓲᖑᓂᕐᒥᒍᓪᓗ, ᑭᓯᐊᓂ, ᑖᑦᓱᒪᐅᑉ ᐃᓗᐊᓂ ᐊᖏᓂᕐᓴᒥᒃ ᓇᒻᒥᓂᖃᕐᑐᑦ ᔦᒥᔅᐯᑉ ᐊᓪᓚᖏᑦ, ᐃᓚᐅᖕᖏᑎᓪᓗᒋᑦ ᓄᓇᕕᐅᑉ ᐃᓄᖏᑦᑕ ᓄᓇᖁᑎᖏᑦ ᐅᑯᓇᓃᑦᑐᓂᒃ:

53°50’06” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°07’59” ᐊᑐᐊᕐᓂᒧᑦ ᖁᒻᒧᐊᖓᔫᑉ;
53°50’13” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°04’11” ᐊᑐᐊᕐᓂᒧᑦ ᖁᒻᒧᐊᖓᔫᑉ;
53°49’46” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°04’27” ᐊᑐᐊᕐᓂᒧᑦ ᖁᒻᒧᐊᖓᔫᑉ;
53°49’40” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°05’00” ᐊᑐᐊᕐᓂᒧᑦ ᖁᒻᒧᐊᖓᔫᑉ;
53°49’25” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°05’35” ᐊᑐᐊᕐᓂᒧᑦ ᖁᒻᒧᐊᖓᔫᑉ;
53°49’31” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°07’20” ᐊᑐᐊᕐᓂᒧᑦ ᖁᒻᒧᐊᖓᔫᑉ;
53°49’49” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°08’00” ᐊᑐᐊᕐᓂᒧᑦ ᖁᒻᒧᐊᖓᔫᑉ;

ᓱᕐᖁᐃᑕᐅᒪᓂᕐᓴᐅᓂᐊᕐᒪᑦ, ᐃᓚᐅᑎᑕᐅᔪᓕᒃ ᐃᒪᖁᑎᒋᔭᐅᔫᑉ ᐃᓗᐊᓂ ᐅᑯᓂᖓ ᕿᑭᕐᑕᓂᒃ ᐊᑦᓯᑕᐅᒪᔪᓂᒃ:

Governor Island: ᕿᑭᕐᑕᖓ: ᑖᑦᓱᒪᐅᑉ ᕿᑎᖓᓂ ᓇᓗᓀᒃᑯᑕᖃᕐᓱᓂ 53°49’45” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°06’00” ᐊᑐᐊᕐᓂᒧᑦ ᖁᒻᒧᐊᖓᔫᑉ
Sam Island: ᕿᑭᕐᑕᖓ: ᑖᑦᓱᒪᐅᑉ ᕿᑎᖓᓂ ᓇᓗᓀᒃᑯᑕᖃᕐᓱᓂ 53°50’00” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°06’00” ᐊᑐᐊᕐᓂᒧᑦ ᖁᒻᒧᐊᖓᔫᑉ
Seal Islands: ᕿᑭᕐᑕᖓᑦ: ᑖᑦᓱᒪᐅᑉ ᕿᑎᖓᓂ ᓇᓗᓀᒃᑯᑕᖃᕐᓱᓂ 53°49’45” ᑕᕐᕋᖓᓂ ᐃᑳᖓᔫᑉ ᐊᒻᒪᓗ 79°07’30” ᐊᑐᐊᕐᓂᒧᑦ ᖁᒻᒧᐊᖓᔫᑉ

ᕿᑭᕐᑕᓄᑦ ᐊᖏᖃᑎᒌᒍᑎᐅᓯᒪᔪᐃᑦ ᓄᓇᖁᑎᖓᑦ

ᓄᓇᕕᒻᒥᐅᑦ ᐃᓄᐃᑦ 10,000 ᐅᖓᑖᓅᕐᐳᑦ, ᓄᓇᓕᓐᓂ ᓯᑦᔭᒦᑦᑐᓂ: ᑲᖏᕐᓱᐊᓗᑦᔪᐊᖅ, ᑰᑦᔪᐊᖅ, ᑕᓯᐅᔭᖅ, ᐊᐅᐸᓗᒃ, ᑲᖏᕐᓱᖅ, ᖁᐊᕐᑕᖅ, ᑲᖏᕐᓱᔪᐊᖅ, ᓴᓪᓗᐃᑦ, ᐃᕗᔨᕕᒃ, ᐊᑯᓕᕕᒃ, ᐳᕕᕐᓂᑐᖅ, ᐃᓄᒃᔪᐊᖅ, ᐅᒥᐅᔭᖅ, ᑰᑦᔪᐊᕌᐱᒃ, ᓯᓵᓯᐱᓗ (ᐃᓄᐃᑦ ᓄᓇᓕᖓ ᐊᓪᓚᓂᒃ ᑯᔩᓂᒃ ᓄᓇᕐᖃᑎᓖᑦ ᓄᓇᕕᐅᑉ ᓯᓚᑖᓃᑦᓱᑎᒃ)

ᓄᓇᕕᐅᑉ ᓄᓇᓕᖏᑦᑕ ᒥᑦᓵᓄᒋᐊᓪᓚᒃ

ᓄᓇᕕᐅᑉ ᓄᓇᓕᖏᑦ ᓄᓇᒦᑦᑐᑦ 1500 ᐊᒻᒪᓗ 2500-ᓂᒃ ᑭᓚᒦᑕᓂᒃ ᐅᖓᓯᓐᓂᓕᒻᒥᒃ ᒪᓐᑐᔨᐊᑉ ᑕᕐᕋᖓᓂᑦ. ᐱᖓᓱᐃᓐᓀᑦ ᑭᓯᐊᓂ ᓄᓇᓖᑦ 1000 ᐅᖓᑖᓄᕐᑐᓂᒃ ᐃᓄᓖᑦ. ᐃᓄᑐᐃᓐᓇᐅᓂᖏᑦ ᐅᓄᕐᓂᖏᑦᑕ 90% ᐳᓴᓐᑎᒐᓚᓐᓂᒃ ᐳᕐᑐᓂᓖᑦ. ᓄᓇᕕᐅᑉ ᓄᓇᓕᖏᑦᑕ ᐊᑯᓐᓂᖏᑦᑎᒍᕐᑐᑕᖃᖕᖏᑐᖅ, ᐅᕝᕙᓘᓐᓃᑦ ᓄᓇᕕᒻᒥᑦ ᐱᔪᕐᒥᑦ ᐊᕐᖁᑎᖃᖕᖏᓱᓂ ᖃᓪᓗᓈᓕᐊᕐᑐᒥᒃ. ᖃᖓᑦᑕᔫᒃᑯᑦ ᑭᓯᐊᓂ ᐱᒍᑦᔭᐅᓲᑦ ᐊᕐᕌᒍᓕᒫᒥ ᐅᒥᐊᕐᔪᐊᖃᕐᐸᓱᑎᓪᓗ ᐅᐱᕐᖔᖑᓕᕐᒪᑦ ᑭᓯᐊᓂ, ᖃᖓᑦᑕᔫᒃᑯᑦ ᑭᓯᐊᓂ ᐱᑎᑕᐅᕙᑦᓱᑎᒃ ᐱᒋᐊᓕᓕᒫᖏᓐᓂᒃ. ᓄᓇᕕᒻᒥ ᐃᓅᒐᓱᐊᕈᑏᑦ ᐊᑭᑐᓂᕐᓴᐅᓂᕋᕐᑕᐅᓯᒪᔪᑦ 69% ᐳᓴᓐᑎᓂᒃ ᐳᕐᑐᓂᕐᓴᐅᓱᓂ ᑯᐯᓕᒫᒥ. 2001-ᒥ ᑲᓇᑕᒥ ᑭᓯᑦᓯᔨᒻᒪᕆᖏᑦ ᑐᓴᕐᑎᓯᓯᒪᔪᑦ ᑕᒪᑦᓱᒧᖓ ᑎᒍᓚᓂᕐᒧᑦ ᐊᒻᒪᓗ ᓄᓇᓖᑦ ᖃᓄᐃᖏᓯᐊᕐᓂᖏᓐᓄᑦ ᐃᓄᐃᑦ ᐊᑯᓐᓂᖏᓐᓂ ᖃᐅᔨᔭᐅᔪᖃᕐᓯᒪᑎᓪᓗᒍ ᑕᒪᒃᑯᐊ ᓂᕿᒋᔭᐅᓱᑐᖃᒐᓓᑦ ᑰᔾᔪᐊᒥ 2-4-ᕕᓪᓗᐊᑐᒥᒃ ᐊᑭᑐᓂᕐᓴᐅᒋᐊᖏᑦ ᑕᒪᒃᑯᓇᖕᖓᑦ ᒪᓐᑐᔨᐊᒥᑦ ᐱᔭᐅᓲᕐᓂᑦ. ᓄᓇᕕᐅᑉ ᐃᓄᖏᑦ ᐃᓚᐅᑎᑕᐅᓲᖑᑦᔭᖏᑦᑐᑦ ᑖᑦᓱᒧᖓ ᐊᓪᓚᓄᑦ ᐱᖁᔭᓕᐊᖑᓯᒪᔪᕐᒧᑦ ᐊᒻᒪᓗ ᐊᑭᓖᓲᖑᑦᓱᑎᒃ ᐃᓗᓐᓇᖏᓐᓂᒃ ᑲᕙᒪᑐᖃᒃᑯᓗ ᑯᐯᒃᑯᓗ ᑖᒃᓯᔭᕈᑎᖏᓐᓂᒃ ᑌᒪᑦᓭᓇᓪᓗᐊᖅ ᐊᓯᖏᑎᑐᑦ ᑲᓇᑕᒥᐅᖑᒻᒥᔪᕐᑎᑐᑦ.

ᓄᓇᕕᐅᑉ ᐃᓄᖏᑦ ᐅᕕᒐᕐᑐᒪᕇᑦ. 75% ᐳᓴᓐᑎᖏᑦ ᐅᖓᑖᓄᑦ ᓄᓇᕕᒻᒥᐅᑦ ᐅᑭᐅᖃᕐᒪᑕ 35 ᐊᑖᓃᑦᑐᓂᒃ 50% ᐳᓴᓐᑎᖏᓪᓗ 20 ᐊᑖᓃᑦᑐᓂᒃ ᐅᑭᐅᖃᕐᑎᓗᒋᑦ ᐱᐊᕃᑦ ᐅᑭᐅᓖᑦ 0-ᒥᑦ 5-ᒧᑦ ᐅᓄᕐᓂᖏᑦ 2.5-ᕕᓪᓗᐊᑐᒥᒃ ᐳᕐᑐᓂᕐᓴᐅᓂᓖᑦ ᑯᐯᓕᒫᒥᑦ. ᑖᒃᑯᐊ ᐅᑭᐅᕐᑕᓕᖏᑦ 1600-ᒐᓚᐅᑦᓱᑎᒃ ᐱᐊᕃᑦ ᐃᓄᑦᑕᖏᑦ 16% ᐳᓴᓐᑎᓄᑦ ᐳᕐᑐᓂᕐᓴᐅᓂᓖᑦ ᓄᓇᕕᓕᒫᒥ. ᓄᓇᕕᐅᑉ ᐃᓄᖏᑦᑕ ᐅᓄᕐᓯᕙᓪᓕᐊᓂᖏᑦ ᐱᖓᓱᕕᓪᓗᐊᑐᒥᒃ ᓯᑕᒪᕕᓪᓗᐊᑐᒥᓪᓘᓃᑦ ᐳᕐᑐᓂᕐᓴᐅᒥᔪᑦ ᑯᐯᓕᒫᒥ. 1950-ᒥᓂᑦ, ᐃᓄᐃᑦ ᐊᑯᓂᐅᓂᕐᓴᖅ ᐃᓅᒍᓐᓇᓚᖓᔪᕆᔭᐅᓂᖏᑦ ᐳᕐᑐᓯᓕᐅᒥᔪᒻᒪᕆᐅᓯᒪᔪᑦ 48-ᕕᓂᐅᑦᓱᑎᒃ 66-ᒧᕐᓱᑎᒃ ᐅᑭᐅᖃᕈᓐᓇᓂᖏᑦ. ᓄᓇᕕᐅᑉ ᓄᓇᓕᖏᓐᓂ ᐱᐅᓯᑐᖃᕆᔭᐅᓲᑐᖃᕐᒥᒃ ᐊᑑᑎᓲᖑᖏᓐᓇᑐᑦ ᑎᒍᐊᕈᓯᑐᖃᕐᒥᒃ. ᑕᓪᓕᒪᓂᒃ ᐃᓅᓕᕐᑐᖃᓕᑐᐊᕐᒪᑦ ᑖᒃᑯᓇᖕᖓᑦ ᐊᑕᐅᓯᕐᒥᒃ ᑎᒍᐊᕐᑕᐅᔪᖃᓯᓲᖑᑦᓱᓂ. ᑕᑯᑦᓱᒋᑦ ᑯᐯᒃᑯᑦ ᐊᓐᓂᐊᓂᓕᕆᔨᖏᑦᑕ ᖃᓄᐃᖏᓯᐊᕐᓂᓕᕆᓂᕐᒧᑦ ᖃᐅᔨᓴᕈᑎᕕᓂᖏᑦ ᓄᓇᕕᐅᑉ ᐃᓄᖏᓐᓂᒃ (1992), 23% ᐳᓴᓐᑎᖏᑦ ᐃᓄᓕᒫᑦ ᐅᑭᐅᖃᓕᕐᑐᑦ 15-ᓂᒃ ᐅᖃᕐᓯᒪᔪᑦ ᑎᒍᐊᖑᓂᕋᕐᓱᑎᒃ ᐊᒻᒪᓗ ᐊᖑᑎᐅᓂᖏᑦᑕ ᐅᓄᕐᓂᖏᑦ ᐊᑦᔨᓗᐊᖃᑐᐃᓐᓇᓯᒪᑦᓱᑎᒃ ᐊᕐᓇᓄᑦ ᐊᒻᒪᓗ ᐃᓄᑑᓈᕐᑎᑐᐃᑦ 57% ᐳᓴᓐᑎᖏᑦ 15-ᓂᒃ ᐅᑭᐅᓖᑦ ᖃᐅᔨᓴᕐᑕᐅᓚᐅᔪᔪᑦ ᑎᒍᐊᕐᑐᕕᓂᐅᓂᕋᓚᐅᔪᑦᓱᑎᒃ ᑎᒍᐊᕐᑎᓯᑦᓱᑎᓪᓘᓃᑦ ᐊᑕᐅᓯᓗᐊᖑᐊᒥᒃ ᐱᐊᕋᕐᒥᒃ.

ᓄᓇᕕᐅᑉ ᐃᓄᖏᑦ ᐅᖃᐅᓯᓖᑦ ᐃᓄᑦᑎᑑᒥᒃ, ᐃᓗᓐᓇᓕᒫᑲᓴᖏᓐᓄᑦ ᐃᓄᓐᓄᑦ ᐅᖃᐅᓯᕆᔭᐅᓲᖑᑦᓱᓂ, ᐅᖃᐅᓯᕐᑖᕆᔭᐅᖏᓐᓇᓕᒫᓲᖑᑦᓱᓂ 95% ᐳᓴᓐᑎᖏᓐᓄᑦ ᐃᓄᓐᓄᑦ. ᐃᓕᓐᓂᐊᑏᑦ ᐱᒋᐊᖕᖓᑐᑦ ᐳᕐᑐᓂᓕᒻᒧᑦ 3-ᓄᑦ ᑎᑭᑦᓱᑎᒃ ᐃᓄᑦᑎᑐᑦ ᑭᓯᐊᓂ ᐃᓕᓐᓂᐊᑎᑕᐅᓲᑦ ᐊᒻᒪᓗ ᐅᖃᐅᓯᑐᐊᕆᔭᐅᓲᖑᑦᓱᓂ ᐯᕆᑦᓯᕕᖏᓐᓂ. 1950-ᐄᑦ ᐊᕐᕌᒍᖏᓐᓃᑎᓪᓗᒋᑦ ᑲᕙᒪᑐᖃᒃᑯᑦ ᐱᒋᐊᕐᑎᓯᓯᒪᔪᑦ ᐃᓕᓐᓂᐊᓂᕐᒥᒃ, ᓱᑲᓯᓕᐅᒥᑎᑦᓯᓱᑎᒃ ᐊᑑᑎᔭᐅᑎᑦᓯᒍᓗᑐᐃᓐᓇᓂᕐᒥᓂᒃ ᓄᓇᕕᐅᑉ ᐃᓄᖏᓐᓂᒃ, ᕿᒻᒦᔭᕐᑕᐅᓯᒪᑦᓱᑎᓪᓗ ᐃᓄᐃᑦ ᕿᒻᒥᑐᐃᓐᓇᖏᓐᓂᒃ ᓄᓇᕕᐅᑉ ᐃᓄᖏᓐᓄᑦ ᐊᑐᕐᑕᐅᖏᓐᓇᑐᓂᒃ ᐃᓅᒐᓱᐊᕈᑎᒋᑦᓱᒋᑦ. ᐃᓗᓐᓂᐊᕖᑦ ᒫᓐᓇᑯᑦ ᑲᒪᒋᔭᐅᓕᕐᑐᑦ ᑲᑎᕕᒃ ᐃᓕᓴᕐᓂᓕᕆᓂᖏᓐᓄᑦ, ᓄᐃᑕᐅᒪᔪᒥᒃ ᑖᒃᑯᓄᖓ ᔦᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓄᑦ.

ᑯᐯᒃ ᓄᓇᒥᓂᒃ ᐊᖏᓕᒋᐊᕐᑎᓯᓂᖓᓄᑦ ᐱᖁᔦᑦ, 1912-ᒥ ᓅᑕᐅᑎᑦᓯᔪᕕᓃᑦ ᓄᓇᕕᐅᑉ ᓄᓇᒋᓕᕐᑕᖓᓂᒃ ᑯᐯᒃᑯᑦ ᐊᕕᑦᑐᓯᒪᓂᖓᓄᑦ ᐱᖁᔭᖃᕐᑎᓗᒍ ᑕᒪᒃᑯᐊ ᓄᓇᖃᕐᖄᓯᒪᔪᑦᓴᔦᑦ ᐱᔪᓐᓇᐅᑎᖏᑦ ᑕᒫᓂ ᓄᓇᒥ ᐃᓕᑕᕆᔭᐅᓯᒪᓂᐊᕆᐊᖏᑦ. ᑯᐯᒃᑯᑦ ᑲᕙᒪᖓᑦ ᐱᕙᓪᓕᐊᑎᑦᓯᒋᐊᓯᓚᐅᕐᓯᒪᓂᑯᖏᓐᓄᑦ ᑰᒻᒥᒃ ᐃᑯᒪᓕᐅᕈᑎᖃᕐᓂᒥᒃ ᔦᒥᔅᐯᓗ ᓄᓇᕕᐅᓪᓗ ᓄᓇᖁᑎᖏᓐᓃᑐᒧᑦ, ᐃᕐᖃᑐᐃᔨᒃᑰᑎᑕᐅᔪᖃᓚᐅᑲᑦᑎᓗᒍ ᓄᐃᑕᐅᔪᖃᓂᐊᓕᕐᒪᑦ ᐅᓪᓗᒥᓂᑕᑦᓴᔭᕐᒥᒃ ᐊᖏᒻᒪᕆᐅᑎᓂᒃ ᓯᕗᓪᓕᐹᑦᓯᐊᖑᑦᓱᓂ ᑲᓇᑕᒥ, ᑖᒃᑯᓂᖓ ᔦᒥᔅᐯᑉ ᐊᖏᖃᑎᒌᓐᓂᖓᓂᒃ. ᓄᓇᕕᐅᑉ ᓄᓇᖁᑎᖓᑕ ᐊᐅᓚᑦᓯᓂᓕᕆᔭᐅᓂᖓ, ᐊᑎᓕᐅᕐᑕᐅᓚᐅᕐᓯᒪᑎᓪᓗᒋᑦ 1975-ᒥᓂᑦ, ᐊᕐᕿᓱᕐᑕᐅᒪᔪᑦ ᐊᖏᒻᒪᕆᐅᑎᐅᓯᒪᔪᐃᑦ ᐊᑖᒍᑦ, ᐊᐅᓚᑦᓯᕕᖃᕐᑎᑕᐅᑎᓪᓗᒋᑦ ᑲᒪᒍᑎᓄᑦ ᐱᕕᑦᓴᐅᔪᕐᓂᒃ ᐆᒪᔪᕐᓂᓗ, ᐅᕙᓂᓗᐊᖑᐊᖅ ᐊᓪᓚᖏᑦ 23-ᒥ (ᐊᕙᑎᓕᕆᓂᕐᒧᑦ ᐊᐅᓚᑦᓯᒪᕆᐅᑎᖏᑦ) ᐊᒻᒪᓗ ᐊᓪᓚᖏᑦ 24-ᒥ (ᐆᒪᔪᕐᓂᐊᓂᕐᒧᑦ ᐃᖃᓗᓐᓂᐊᓂᕐᒧᓗ ᐊᐅᓚᑦᓯᒪᕆᐅᑎᖏᑦ). ᑖᒃᑯᐊ ᑕᒪᖏᒃ ᐊᐅᓚᑦᓯᒪᕆᐅᑎᓕᐊᖑᓯᒪᔪᑦ ᐱᖁᔭᖕᖑᑎᑕᐅᓯᒪᔪᑦ ᐊᑖᒍᕐᓂᖃᕐᓱᑎᒃ ᑯᐯᒃ ᐊᕕᑦᑐᓯᒪᔫᑉ ᐱᖁᔭᖏᑦᑕ. ᐊᒻᒪᓗ ᓄᐃᑕᐅᔪᖃᕐᓯᒪᓂᒃᑯᑦ ᖃᓄᐃᓕᒋᐊᖁᔨᔩᑦ ᑎᒥᖁᑎᖏᓐᓂᒃ ᑲᒪᒋᔭᖃᕐᑐᓂᒃ ᐊᑐᓂᑦ ᐊᐅᓚᑦᓯᒪᕆᐅᑎᓕᐊᖑᓯᒪᔪᐃᑦ ᑲᒪᒋᔭᐅᒍᑎᖏᓐᓄᑦ.